Тадбирда икки мамлакатнинг вазирлик ва идоралари, ҳудудлар, тармоқ уюшмалари раҳбарлари ҳамда 300 дан ортиқ компания вакиллари иштирок этди. Форум Ўзбекистон Республикаси Инвестициялар, саноат ва савдо вазирлиги томонидан Савдо-саноат палатаси кўмагида ташкил этилди.

Форумда Ўзбекистон делегациясига Ўзбекистон Республикаси Бош вазирининг ўринбосари Жамшид Ходжаев, Монголия томонига эса Монголия Бош вазирининг ўринбосари Сайнбуянгийн Амарсайхан раҳбарлик қилди.

Тадбир модераторлари сифатида Ўзбекистон Республикаси Инвестициялар, саноат ва савдо вазирининг ўринбосари Илзат Касимов ва Монголия Миллий савдо-саноат палатаси Халқаро ҳамкорлик департаменти директори Солонго Энхсайхан иштирок этди.

Форум иштирокчиларига мурожаат қилар экан, Жамшид Ходжаев сўнгги йилларда Янги Ўзбекистонда бизнес муҳити ва инвестиция жозибадорлигини яхшилаш бўйича амалга оширилган кенг кўламли ислоҳотларга эътибор қаратди. Натижада, мамлакат ЯИМ икки баробарга ошиб, илк бор $100 миллиарддан ошди, 2024 йилда иқтисодий ўсиш суръати 6,5% ни ташкил этди. Мамлакатга $70 миллиарддан ортиқ тўғридан-тўғри хорижий инвестициялар жалб қилинди.

Ўзбекистон ҳукуматининг хорижий инвесторларни тўлиқ қўллаб-қувватлашга ва қўшма лойиҳаларни муваффақиятли амалга ошириш учун барча шарт-шароитларни яратишга тайёр эканлиги яна бир бор тасдиқланди.

Ўзаро манфаатли ҳамкорлик учун устувор йўналишлар белгиланди. Жумладан, савдо соҳасида мева-сабзавот маҳсулотлари, ўғитлар, қурилиш материаллари, фармацевтика, маиший техника, тўқимачилик, пойабзал, гўшт, чарм, жун маҳсулотлари экспорти, савдо уйлари ва кўргазмалар ташкил этиш каби ташаббуслар илгари сурилди.

Иккала давлат ўртасидаги саноат кооперацияси чарм, жун ва каşемирни қайта ишлаш, электр жиҳозлари, машиналар ва қурилиш материаллари ишлаб чиқариш бўйича қўшма корхоналарни ташкил этиш орқали ривожланади.

Қишлоқ хўжалиги ва чорвачилик йўналишларида иссиқхоналар қуриш, томчилатиб суғориш технологияларини жорий этиш, ҳосилни сақлаш ва қайта ишлаш бўйича лойиҳалар илгари сурилди.

Фойдали қазилма конларини қидириш ва ўзлаштириш бўйича қўшма лойиҳалар катта истиқболларга эга экани таъкидланди.

Ўз навбатида, Монголия Бош вазири ўринбосари Сайнбуянгийн Амарсайхан Ўзбекистонда яратилган қулай инвестиция муҳитини юқори баҳолаб, Монголия тадбиркорларини ўзбек ҳамкорлари билан фаол ва дадил ҳамкорлик қилишга чақирди.

Форум якунида жун, аралаш матолар, тўқимачилик ва чарм маҳсулотларини Ўзбекистонда ишлаб чиқаришга оид қўшма лойиҳаларни амалга ошириш бўйича икки томонлама ҳужжатларни алмашиш маросими бўлиб ўтди.

Форум доирасида “Made in Uzbekistan” миллий маҳсулотлари кўргазмаси очилди, унда ўзбек ишлаб чиқарувчиларнинг маҳсулотлари намойиш этилди. B2B ва G2B учрашувлари ўтказилди. Тадбиркорлар амалий ҳамкорлик йўналишларини муҳокама қилиб, кейинги ҳамкорлик учун аниқ қадамларни белгилаб олишди.