Ўзбекистонда "Ўзбекистон-2030" стратегияси, Болалар саратони бўйича глобал ташаббус (GICC), Барқарор ривожланиш мақсадлари доирасида ЖССТ, ЮНИСЕФ, Вена халқаро тиббиёт университети ва бошқа халқаро ташкилотлар кўмагида 2025-2030 йилларга мўлжалланган Болалар саратонига қарши курашиш миллий стратегияси ишлаб чиқилди ва қабул қилинди.

Ушбу воқеа болалар саратонига қарши курашда янги босқични бошлаб беради, ташхис қўйиш ва даволашда мултидистсиплинар ёндашувни таъминлаш орқали педиатрия ёрдамини кўрсатиш тизимини такомиллаштиради.

Миллий стратегия соғлиқни сақлаш тизимини модернизация қилишга йўл очади, кадрлар ва инфратузилма салоҳиятини мустаҳкамлайди, болаларга барча даражаларда юқори сифатли тиббий ёрдам кўрсатишга ягона ёндашувни шакллантиради.

"Болалар саратони энди оилалар ёлғиз ўзи курашаётган муаммо эмас, бу миллий устуворликка айланди," - дея таъкидлади Ўзбекистон Республикаси соғлиқни сақлаш вазири Асилбек Худаёров. "Стратегия 2030 йилга келиб яшовчанлик даражасини камида 60 фоизга етказиш ва ўлим кўрсаткичини 2,5 баравар камайтириш бўйича мажбуриятимизга мос келади, бу эса жаҳондаги илғор тажрибани акс эттиради".

15 май куни вазирлик ва идоралар, Ота-оналар уюшмаси, халқаро ташкилотлар, жумладан БМТнинг Ўзбекистондаги Доимий мувофиқлаштирувчиси офиси, Жаҳон соғлиқни сақлаш ташкилоти (ЖССТ), БМТ Болалар жамғармаси (ЮНИСЕФ), БМТ Тараққиёт дастури (БМТТД), Бирлашган Миллатлар Ташкилотининг Аҳоли жаҳон жамғармаси (UNFPA), БМТ Озиқ-овқат ва қишлоқ хўжалиги ташкилоти (ФАО), БМТнинг Лойиҳаларга хизмат кўрсатиш бошқармаси (YUNOPS), жамоат бирлашмалари етакчи вакиллари ҳамда соҳа мутахассислари Стратегияни амалга ошириш йўлларини муҳокама қилдилар.

Кўп соҳали мулоқотда иштирокчилар яхлит ёндашувнинг муҳимлигини таъкидлаб, асосий жиҳатларни муҳокама қилдилар: эрта ташхис қўйиш ва даволашнинг замонавий дастурларини жорий этиш зарурати, тиббиёт муассасалари инфратузилмасини такомиллаштириш, малакали кадрлар тайёрлаш, онкологик хизматларни рақамлаштириш орқали тиббий ёрдам кўрсатиш, кенг қамровли мониторинг тизимлари, шунингдек, руҳий-ижтимоий ва оилавий қўллаб-қувватлаш йўллари.

Тадбирда сўзга чиққан ЖССТнинг Ўзбекистондаги ваколатхонаси раҳбари доктор Ашина Халакдина шундай деди: "Болалар саратони бўйича миллий стратегияни - аниқ мақсадлар, аниқ чора-тадбирлар ва имкон қадар кўпроқ болалар ҳаётини сақлаб қолиш учун зарур ресурсларни ўз ичига олган ҳужжатни ишлаб чиқиш Ўзбекистон учун муҳим қадамдир. Ушбу стратегия мамлакатда тўпланган ҳақиқий маълумотлар асосида саратон касаллигига чалинган болаларга сифатли ёрдам кўрсатиш имкониятини кенгайтиришга ёрдам беради".

Ўзбекистон олдинга қараб дадил қадамлар ташлади. Мамлакат ЖССТнинг болалар саратонига қарши кураш бўйича Глобал ташаббусига қўшилди ва саратон касаллигига чалинган болаларни дори воситалари билан таъминлаш бўйича Глобал платформанинг иштирокчисига айланди. Бунинг натижасида бугун мамлакат бўйлаб 16 та тиббиёт муассасасида болалар хавфсиз, самарали ва бепул дори воситаларини олмоқда.

ЖССТ Ўзбекистонни, айниқса, стратегия амалда ишлаши учун бошқарув тизимини йўлга қўйиш, саъй-ҳаракатларни мувофиқлаштириш ва маълумотлардан фойдаланиш масалаларида қўллаб-қувватлашни давом эттиради.

"Болалар саратони бўйича кўп тармоқли стратегия муҳим бўлиб, саратон касаллигига қарши курашда ривожланишни тезлаштириш ва барча муҳим тузилмаларни бирлаштириш учун жиддий имконият яратади," - деди ЮНИСЕФнинг Ўзбекистондаги ваколатхонаси раҳбари Рехина Мария Кастижио. "Бундай жамоавий ёндашув муҳим, чунки болалар саратонига қарши кураш нафақат ҳаётларни сақлаб қолади, балки оилалар ва соғлиқни сақлаш тизимига узоқ муддатли иқтисодий юкни ҳам камайтиради".