Мулоқот давомида Чин мулозими икки давлат етакчиларининг шахсий намунаси ва рағбати остида ўзаро муносабат юқори чўққисига кўтарилиб, янада кенг истиқболдан дарак бераётганини таъкидлаган. Дарҳақиқат, икки томоннинг бир-бирига ишончи тобора кучайиб, ҳар томонлама манфаатли ҳамкорлик ижобий силжиш намоён этаётгани, иқтисодий, савдо ва сармоя айланмаси кўлами кенгайиб бораётгани қувонарли. Йирик лойиҳалар амалга оширилаётгани, визадан озод қилиш тўғрисидаги битим илгари сурилиб, ҳаётга татбиқ этилаётганига урғу берилди.

Учрашувда 2024 йил январда Президент Шавкат Мирзиёевнинг Хитойга давлат ташрифи чоғида эришилган келишувларга мувофиқ, Чин мамлакатида Ўзбекистон туризм йили муваффақиятли очилгани таъкидланди. Шунингдек, Хитой - Қирғизистон - Ўзбекистон темир йўли муддатидан олдин очилишига кўмаклашиш, сунъий интеллект, рақамли савдо ва иқлим ўзгариши каби ривожланаётган соҳаларда шерикликни кенгайтириш, янада таъсирчан “ҳисобот картаси”ни яратиш, ҳар икки томоннинг модернизация жараёнини илгари суриш ва тараққиётни жадаллаштиришда ўзаро ёрдамга тайёрлиги қайд этилди.

Ўзбекистон ташқи сиёсат идораси раҳбари таъкидлашича, ХХР янги даврда ўз цивилизациясининг теран меросини тўлиқ намоён этган ҳолда, улкан тараққиётга эришди. Ўзбекистон буни чуқур қадрлайди. Икки давлат раҳбарларининг узоқни кўзлаган сиёсати туфайли Ўзбекистон - Хитой муносабатлари янги даврда ҳар қандай шароитда кенг қамровли стратегик шериклик даражасига кўтарилди ва бу турли соҳалардаги амалий ҳамкорликда янги истиқбол очди. Ҳозир халқаро миқёсда чуқур ўзгаришлар кузатилмоқда, “Хитой - Марказий Осиё” механизмининг стратегик аҳамияти тобора ортяпти.

Томонлар ШҲТ доирасидаги ҳамкорликни мустаҳкамлаш юзасидан ҳам фикр алмашдилар. Шунингдек, алоқалар ривожидаги юқори ўсиш суръати сақлаб қолиниши муҳимлигини мақулладилар.