Мәмлекетимизде ҳәр бир тараўды раўажландырыўда кадрлар мәселесине айрықша итибар қаратылмақта. Жаслардың оқыўы, қәнигелердиң тәжирийбе арттырыўы мәмлекет тәрепинен қоллап-қуўатланбақта.

Усы мақсетте «Эл-юрт умиди» қоры тәрепинен 2 мың 225 стипендиат 45 ке шамалас мәмлекетке оқыўға жиберилип, бюджеттен жәми 1,5 триллион сум қаратылды. Ҳәзирги ўақытқа шекем олардың 1 мың 400 и Өзбекстанға қайтып, экономика тармақларында, билимлендириў, илим, медицина ҳәм мәмлекетлик басқарыўда жумыс ислемекте. Бүгинги күнде 748 стипендиат «ТОП-300» дизиминдеги абырайлы университетлерде билим алмақта.

Енди бундай жумыслардың көлемин буннан былай да кеңейтиў мақсетинде бул фондты Өзбекстан Республикасы Президенти жанындағы Перспективалы кадрларды таярлаў бойынша «Эл-юрт умиди» қоры етип, Мәмлекетлик басқарыў академиясын Өзбекстан Республикасы Президенти жанындағы Мәмлекетлик сиясат ҳәм басқарыў академиясы етип қайта шөлкемлестириў нәзерде тутылмақта. Олар Мәмлекетлик хызметти раўажландырыў агентлиги менен биргеликте кадрлар таярлаў кластерине айландырылады.

Соның ишинде, перспективалы қәнигелерди сырт елде таярлаў бойынша бакалавриат, магистратура ҳәм докторантура менен бир қатарда мәмлекетлик хызметкерлер алты айға шекем мақсетли стажировкаға жибериледи. Онда энергетика, урбанизация, транспорт, архитектура, геодезия, жер қатнасықлары, техника, инженерлик сыяқлы экономиканың драйвер тараўларына, мәмлекетлик басқарыў ҳәм әҳмийетли социаллық бағдарларға үстинлик бериледи.

Халықаралық рейтинглерде «ТОП-100»лик университетлерге грант тийкарында оқыўға кирген талабанларға «Эл-юрт умиди»  стипендиясы имтиханларсыз ажыратылады. «ТОП-300» дизиминдеги университетлерге грантқа киргенлерге халықаралық транспорт ҳәм турақ жай қәрежетлери имтиханларсыз қаплап бериледи. «ТОП-20»лықтағы университетлердиң бакалавриатына 50 процент грант тийкарында қабыл етилген Президент мектеплериниң питкериўшилерине стипендиялар таңлаўларсыз ажыратылады.

Сырт елде оқып атырған ўатанласларымыз бенен турақлы байланыста болыў, олардың талапларын анықлаў ҳәм тәлим-тәрбия процесслеринде жәрдемлесиў мақсетинде «Эл-юрт умиди» қоры стипендиантларының ата-аналар кеңеси дүзиледи. Елшихана ҳәм консуллықларға студентлерге ҳуқықый ҳәм шөлкемлестириўшилик жәрдем көрсетиў ўазыйпалары жүкленеди.

Заман талапларына сай қәнигелер таярлаўда Мәмлекетлик сиясат ҳәм басқарыў академиясының да орны үлкен. Ол жерде «Ҳәкимлер мектеби», «Басшы ҳаял-қызлар мектеби», «Келешек лидерлери» сыяқлы курсларда алдынғы билимлендириў бағдарламалары жолға қойылған. Өткен оқыў жылында 13 мыңнан аслам тыңлаўшылардың маманлығы арттырылған.

Жаңа системаға тийкарланып, енди мәмлекетлик хызметкерлер ушын 3 бағдарлама – маманлық арттырыў, қайта таярлаў ҳәм магистратура жолға қойылады. Барлық узақ ҳәм орта мүддетли оқыўлар сырт елли бирге ислесиўшилер менен биргеликтеги билимлендириў бағдарламалары ҳәм Экономикалық бирге ислесиў ҳәм раўажланыў шөлкеминиң таяныш усыныслары тийкарында шөлкемлестириледи.

Магистратурада «Мәмлекетлик басқарыў», «Мәмлекетлик сиясат», «Аймақларды комплексли раўажландырыў»,  «Инсан ресурсларын раўажландырыў» ҳәм «Мәмлекетлик қаржыларды басқарыў» бағдарларында 18 айға шекемги мүддетте тереңлестирилген билимлер бериледи. Мәмлекетлик буйыртпадан тысқары төлемли-контракт түринде де талабанлар қабыл етиледи.

Академияда билимлендириў бағдарламалары ҳәм илимий изертлеўлердиң сапасын арттырыў бойынша усыныслар бериў, абырайлы сырт ел илимий-билимлендириў мәкемелери менен бирге ислесиў орнатыў ушын Халықаралық академиялық мәсләҳәт кеңеси дүзиледи.

Сондай-ақ, академия жанында 4 жаңа орай шөлкемлестирилмекте. Мысал ушын, Мәмлекетлик басқарыў машқалаларын илимий-әмелий изертлеў орайы мәмлекетлик хызметтиң нәтийжелилигин арттырыў, жеке меншик сектордағы алдынғы әмелиятларды мәмлекетлик басқарыўда енгизиўге қаратылған усыныслар берип барады.

Президентимиз усынысларды мақуллап, бул системаларды жаңаша қатнаслар тийкарында енгизиў, қор ҳәм академия хызметкерлериниң маманлығын арттырыў бойынша көрсетпелер берди. Қәбилетли жасларды турақлы излеп табыў ҳәм жоқары дәрежеде оқытыў, маман қәнигелерди реформаларға тартыў әҳмийетли екенлиги атап өтилди.