Мәмлекетимиз басшысы дәслеп Имам Бухарий комплексин зыярат етти. Қуран оқылып, пәтия етилди.

– Күни кеше халқымыз бенен Наўрыз әййямын күтип алдық. Бүгин, муқаддес Рамазан айында мине, усы теберик жерге келип турмыз. Усы уллы күнлерге тынышлық-татыўлықта жеткергени ушын Жаратқанға шүкирлер айтамыз. Илайым, бәрқулла елимиз тыныш, халқымыз абадан болсын, барлық қайырлы нийетлеримиз әмелге ассын. Бул комплексти Имам Бухарий бабамызға мүнәсип тәризде қурып атырмыз. Ол зыярат пенен бирге ағартыўшылық, тәрбия, ибрат ошағы болсын, -деди Шавкат Мирзиёев.

Имам Бухарий мақбарасы пүткил ислам әлеминде қәдирли орын. Көп мыңлаған санлы зыяратшыларға шараятларды кеңейтиў мақсетинде Президентимиздиң басламасы менен бул жерде жаңа комплекс қурылмақта.

Комплекстиң улыўмалық майданы 44 гектар. Бүгинги күнде саўлатлы мақбара, 10 мың адамға мөлшерленген мешит қурып питкерилген. Бийиклиги 75 метрлик 4 минара комплекске уллылық бағышлаған. Сондай-ақ, музей, әйўанлар, ҳәкимшилик ҳәм хызмет көрсетиў имаратлары қурылған.

Ҳәзирги ўақытта пардозлаў жумыслары алып барылмақта. Бунда миллий дәстүрлер ҳәм ашық реңлерден пайдаланылмақта. Алдыңғы тәрепи ҳәм әйўан дийўалларына «Саҳиҳи Бухарий» дан ҳәдислер жазылған.

Буннан тысқары, аймақта еки мың орынлық жигирмадан аслам мийманхана, қыябанлар, хызмет көрсетиў шақапшалары қурылады.

Быйыл елимизде Имам Матуридий туўылғанының 1155 жыллығы кеңнен белгиленеди. Бул туўралы Президент қарарында калам илими султанының Самарқанд қаласындағы комплексин қайта оңлаў ҳәм абаданластырыў белгиленген.

Сапар етиў барысында Президентимизге бул жойбар таныстырылды.

Атап өтилгениндей, Мотуридий комплексинде 1 мың 500 адамға мөлшерленген жәмәәтлик мешити, администрация имаратының қурылысы нәзерде тутылған. Ол жерде китапхана, мәжилислер залы, инновациялық музей және қәнигелер ушын бөлмелер болады. Комплекс жанында автомобиль туратуғын орын шөлкемлестириледи, зыяратшылар ушын қосымша қолайлылықлар жаратылады.

Имам Әбиў  Мансур Матуридий ислам әлеминде қарама-қарсылықлар  ҳәўиж алып, ҳәр қыйлы идеологиялар көбейген ўақытта жасаған, пүткил өмирин исламға исенимди қорғаў ҳәм ағартыўшылықты ен жайдырыўға бағышланған. Ол инсанның матурийдийлик тәлийматы, «Таъвилотул Қуръон», «Китоб ат-Тавҳид» сыяқлы шығармалары кеңпейиллик ҳәм бийтәреп принциплери менен суннийлер жәмәәтиниң руўхый тийкарларына айланған.

Мәмлекетимиз басшысы бул принциплер бүгинги күнде де әҳмийетли болып атырғанын атап өтип, улама бабамыздың мийрасын буннан былай да кеңнен үйрениў ҳәм дүньяға үгит-нәсиятлаў, комплекске келиўшилерге шараятларды кеңейтиў бойынша көрсетпелер берди.

Және бир саўаплы жойбар – Ақдәрья районындағы Маҳдумы Аъзам зыярат орнын абат етиўге қаратылған. Негизи ҳәзирги Касансай районында туўылған суфий илимпаз нақшбандия тәлийматының жолбасшыларынан бири болған. Илим ҳәм дин жолындағы узақ сапардан кейин, Самарқандта жерленген.

Бул жерге келетуғын зыяратшылар да көп. Оларға шараятларды жақсылаў мақсетинде комплекс аймағында қурылыс-абаданластырыў жумыслары әмелге асырылады, бүгинги күн талапларына сәйкес қосымша қолайлылықлар жаратылады.

Таныстырыў барысында Самарқанд жеринен жетисип шыққан басқа да илимпаз ҳәм ойшыллар, әзиз уламалардың зыярат орынлары да басқышпа-басқыш оңланып, абат етилетуғыны айтылды.

Кейинги жылларда ең заманагөй стандартларға сай инфраструктура жаратылғаны себепли Самарқанд қаласы халықаралық масштабтағы ири илажлар – жоқары дәрежедеги саммитлер, конференциялар ҳәм конгресслердиң дәстүрий өткерилетуғын орнына айланды.

2022-жылы мәмлекетимиз басшысының басламасы менен «Уллы жипек жолы» комплекси қурылғаны бул бағдардағы жумысларды жаңа басқышқа алып шығып, Самарқандтың халықаралық орай сыпатындағы потенциалын буннан былай да арттырды.

Шавкат Мирзиёев бул Халықаралық туризм орайына барып, алып барылып атырған дөретиўшилик жумыслары, жаратылып атырған шараятлар менен танысты. Комплексте сырт елли делегациялар ҳәм туристлерге хызмет көрсетиўдиң сапасын арттырыў, қолайлылықларды кеңейтиўге қаратылған бираз жумыслар алып барылмақта, бир қатар жаңа объектлер қурылмақта.

Соның ишинде, орай аймағында улыўма майданы 1150 квадрат метр болған ири концерт залы қурылмақта. 100 адамды қабыллай алатуғын мәденият орны заманагөй акустикалық үскенелер менен тәмийинленбекте.

Президентимиз сырт елли делегациялар, еки тәреплеме ушырасыўлар ушын қолайлылықларды арттырыў бойынша усыныслар берди.

Усы жердиң өзинде Самарқанд ўәлаяты ҳәкими аймақтың социаллық-экономикалық раўажланыўы бойынша мәмлекетимиз басшысына есап берди.

Быйылғы жылы Самарқандта ири халықаралық әнжуманлар болып өтетуғынын атап өтиў керек. Бүгинги күнде «Орайлық Азия – Европа Аўқамы» биринши саммити ҳәм Климат форумы, «Орайлық Азия – Араб қолтығы мәмлекетлери» саммити, ЮНЕСКО Бас конференциясының 43-сессиясын өткериўге қызғын таярлық көрилмекте.

Мәмлекетимиз басшысы Шавкат Мирзиёев Самарқанд қаласына сапарының соңында Ҳәзирети Хизр комплексинде болып, Биринши Президентимиз Ислам Кәримовтың мақбарасын зыярат етти.

Қуран аятлары ҳәм пәтия оқылды.

Марҳумлардың жақсылықларын еслеў, қойымшылықларды абаданластырыў халқымыздың ийгиликли қәдриятларынан бири болып табылады. Бул мақбара да Президентимиздиң басшылығында қурылған, әзиз зыярат орнына айландырылған. Мүбәрек Рамазан айында бундай жақсы әмеллер барлық жерлерде айқын көзге тасланбақта.