Халықтың турмыс сапасында әҳмийетли болған бундай ислерге қамтып алыў кеңейип бармақта. Быйыл 1 мың 619 километр ишимлик суўы, 521 километр ақаба суў тармақларын тартыў, системадағы 162 имаратты қурыў ҳәм рефонструкциялаў режелестирилген. Булардың нәтийжесинде 715 мың халыққа биринши мәрте таза ишимлик суўы жетип барады, 135 мың хожалық ақаба тармағына жалғанады, 157  мың тутыныўшыға заманагөй есаплағыш орнатылады.

Жақында мәмлекетимиз басшысының Францияға сапары шеңберинде Сурхандәрья ҳәм Қашқадәрья ўәлаятларында ишимлик суўы бойынша 340 миллион евролық 3 жойбар келисилди. Соның ишинде, Францияның «Suez» компаниясы, Денов, Шўрчи, Сариосиё ҳәм Қумқорғандағы ишимлик суўы тәмийнатын жеке меншик басқарыўға алмақта. Нәтийжеде ўәлаятта орайласқан ишимлик суўына қамтып алыў 90 процентке жетиўи күтилмекте.

Ақаба тармағының бар екенлиги қурылыс, санаат ҳәм хызметлердиң раўажланыўы ушын әҳмийетли фактор. Оны кеңейтиў ушын бюджеттен ҳәр жылы триллионлаған қаржы жумсалмақта. Бирақ, тек ғана усыған қарап қалмастан тараўға жеке меншик секторды кеңирек тартыў зәрүр екенлиги көрсетип өтилди.

Мәселен жергиликли исбилермен Азия раўажланыў банки қатнасыўында Алмалық, Бекабад, Ангрен ҳәм Шыршық қаласында ақаба суў тазалаў имаратларын қурмақта. Және бир исбилермен Әндижандағы еки районда суў ҳәм ақаба хызметлерин жеке меншик басқарыўға алыў басламасы менен шыққан.

Усындай жеке меншик шериклик жойбарларын көбейтиў, ири кәрханаларымыздың халықаралық тендерлерде қатнасыў имканиятын кеңейтиў зәрүр екенлиги атап өтилди.

Халықаралық қаржы институтларының қатнасыўындағы жойбарларды әмелге асырыў процесин әпиўайыластырыў бойынша қарар қабыл етилди. Енди тендерлерди тезлестирип, жылдың ақырына шекем 850 миллион долларлық жумысларды орынлаў тапсырмасы берилди.

Және бир әҳмийетли ўазыйпа – тараўды санластырыў. Оның ушын Азия раўажланыў банкинен 125 миллион доллар тартылатуғыны белгиленген. Бес жылда ири суў имараты ҳәм магистраль қубырларға 4 мың 800 «ақыллы» есаплағыш, 2 мың 800 телеметрия системасын орнатыў нәзерде тутылған.

Бул электротехника санааты ушын үлкен базар екени атап өтилип, есаплағыш ислеп шығарыўды көбейтиў, оларға хызмет көрсетиўди басқышпа-басқыш жеке меншик секторға өткериў бойынша көрсетпе берилди.

Ыссылық тәмийнаты тәбийғый газ ең көп жумсалатуғын тараўлардан бири. Соның ушын 11-март күни бул тараўды пүткиллей реформалаў ҳәм энергия нәтийжелилигин арттырыў бойынша Президент қарары қабыл етилди. Оған муўапық, «Ыссылық тәмийнаты» компаниясы шөлкемлестирилип, аймақлардағы 23 кәрхана оның қурамына өткерилди. Кейинги бес жылда ыссылық системаларын тиклеў ушын 19 триллион сум қаратылады. Орайласқан ыссылық тәмийнатына қамтып алыў 37 проценттен 58 процентке жетеди.

Қурылыс ҳәм турақ жай коммуналлық хожалығы министрлигине көп қабатлы турақ жайлар ҳәм социаллық мәкемелерде энергия нәтийжелилигин арттырыў бойынша тапсырма берилди. Атап өтилгениндей, 9 мың турақ жай ҳәм имаратлар жабық ысытыў системасына өткериледи. Нәтийжеде ыссылық жойтылыўы 2 есеге, газден пайдаланыў 20 процентке азаяды.

Мәжилисте бәҳәрги егис илажларына да тоқтап өтилди. Ҳәкимликлер резервинде турған жерлерди ажыратыўдың әпиўайыластырыў илажлары белгиленди.

Енди аўылдағы жерлерди аукционда бөлип-бөлип төлеў шәрти менен сатыў бийкар етиледи. Аукционда сатылмаған жердиң баҳасы кейинги саўдаларда күнине 10 проценттен төменлетиледи. Қайта аукционда бир қатнасыўшы қатнасса да, жеңимпаз болып есапланады. Жердиң 10-20 проценти шарўа ушын азықлық егиўге шығарылады.

Ҳәзирги ўақытта 93 мыңнан артық фермерлердиң жумысы исбилерменлик рейтинги арқалы баҳаланбақта. Енди бул рейтинг өнимдарлық, жумысшы саны, өним көлеми сыяқлы нормалар бойынша айрықша болыўы мәлим етилди.

Жоқары рейтингтеги фермерлерге кредитти қайтпаў қәўпин қамсызландырыў талабы бийкар болады. Жер салығы 3 есеге, фермерлер кеңесине төленетуғын төлем 2 есеге азайтылады. Пахта ҳәм ғәлледе нормадан көп өним алғанларға 25 процентке шекемги жеринде шарўа азығы, овощ, собықлы ҳәм басқа егинлерди гезеклестирип егиўге руқсат бериледи.

Президент бийлиги менен жәрияланған әҳмийетли бир айлық шеңберинде мәҳәллелерде алып барылып атырған дийқаншылық ҳәм абаданластырыў жумыслары ҳаққында мәлимлеме берилди.

Бәҳәрде 125 миллион туп нәл егилиўи мөлшерленген. Онда егислик орынларды дурыс таңлаў, суўғарыўды жақсылаў әҳмийетли екени атап өтилди. Соның ишинде, суў тәмийнаты аўыр мәҳәллелерде геомембрана қапламалы ҳәўизлер қурылады.

Өткен жылы тәжирийбе түринде 208 мәҳәлледе «мәҳәлле-сервис» компаниялары шөлкемлестирилип, халыққа 23 түрдеги хызметлер көрсетиў жолға қойылған еди. Енди бул система кеңейтилип, және мың сондай компания дүзиледи. Хызметлер түри де кеминде 30ға жеткериледи. Қытай тәжирйибеси тийкарында 5 мың мәҳәллеге хызмет көрсетиў бойынша оқытылады ҳәм 15 мың халықтың бәнтлиги тәмийинленеди.

Быйылдан 208 районлық ҳәм қалалық абаданластырыў бөлимлериниң қурамында ишки жолларды сақлаў участкалары шөлкемлестирилди. Оларға қосымша 5 түрдеги арнаўлы техника сатып алыў ушын 700 миллиард сум ажыратылды. Жуўапкерлерге ишки жолларды оңлаў, мәҳәллелерде энергия тәмийнатын жақсылаў бойынша тапсырмалар берилди.

Мәжилисте Бас министрдиң орынбасарлары, министрлер ҳәм ҳәкимлердиң мәлимлемеси тыңланды.