Muloqot davomida Chin mulozimi ikki davlat yetakchilarining shaxsiy namunasi va rag‘bati ostida o‘zaro munosabat yuqori cho‘qqisiga ko‘tarilib, yanada keng istiqboldan darak berayotganini ta’kidlagan. Darhaqiqat, ikki tomonning bir-biriga ishonchi tobora kuchayib, har tomonlama manfaatli hamkorlik ijobiy siljish namoyon etayotgani, iqtisodiy, savdo va sarmoya aylanmasi ko‘lami kengayib borayotgani quvonarli. Yirik loyihalar amalga oshirilayotgani, vizadan ozod qilish to‘g‘risidagi bitim ilgari surilib, hayotga tatbiq etilayotganiga urg‘u berildi.

Uchrashuvda 2024 yil yanvarda Prezident Shavkat Mirziyoyevning Xitoyga davlat tashrifi chog‘ida erishilgan kelishuvlarga muvofiq, Chin mamlakatida O‘zbekiston turizm yili muvaffaqiyatli ochilgani ta’kidlandi. Shuningdek, Xitoy - Qirg‘iziston - O‘zbekiston temir yo‘li muddatidan oldin ochilishiga ko‘maklashish, sun’iy intellekt, raqamli savdo va iqlim o‘zgarishi kabi rivojlanayotgan sohalarda sheriklikni kengaytirish, yanada ta’sirchan “hisobot kartasi”ni yaratish, har ikki tomonning modernizatsiya jarayonini ilgari surish va taraqqiyotni jadallashtirishda o‘zaro yordamga tayyorligi qayd etildi.

O‘zbekiston tashqi siyosat idorasi rahbari ta’kidlashicha, XXR yangi davrda o‘z sivilizatsiyasining teran merosini to‘liq namoyon etgan holda, ulkan taraqqiyotga erishdi. O‘zbekiston buni chuqur qadrlaydi. Ikki davlat rahbarlarining uzoqni ko‘zlagan siyosati tufayli O‘zbekiston - Xitoy munosabatlari yangi davrda har qanday sharoitda keng qamrovli strategik sheriklik darajasiga ko‘tarildi va bu turli sohalardagi amaliy hamkorlikda yangi istiqbol ochdi. Hozir xalqaro miqyosda chuqur o‘zgarishlar kuzatilmoqda, “Xitoy - Markaziy Osiyo” mexanizmining strategik ahamiyati tobora ortyapti.

Tomonlar SHHT doirasidagi hamkorlikni mustahkamlash yuzasidan ham fikr almashdilar. Shuningdek, aloqalar rivojidagi yuqori o‘sish sur’ati saqlab qolinishi muhimligini maqulladilar.