Muhim xalqaro tadbir oldidan JSST Yevropa mintaqaviy byurosi tomonidan “Markaziy Osiyo – sildan xoli” tashabbusining boshlanishi” mavzusida submintaqaviy yig‘ilish o‘tkazildi.

Qayd etilganidek, mintaqa davlatlari bu xastalikka chalingan minglab odamlarning hayotini saqlab qolishda sezilarli yutuqlarga erishmoqda.

Xususan, O‘zbekistonda sog‘liqni saqlash sohasida keng qamrovli islohotlar amalga oshirilmoqda. Bunda sil bilan kasallanish darajasini pasaytirish va mamlakatning 2050-yilga borib xastalikni bartaraf etish bo‘yicha majburiyatlari aniq belgilab qo‘yilgan. 

Mamlakatimizda bemorlarni tashxislash hamda davolashda sezilarli yutuqlarga erishildi va shu tariqa O‘zbekiston sil kasalligiga qarshi kurashda global taraqqiyotga salmoqli hissa qo‘shgan davlatlar qatoriga qo‘shildi.

Yig‘ilishda “Markaziy Osiyo – sildan xoli” tashabbusi ushbu xastalikka qarshi kurashda mintaqa davlatlari hamkorligi uchun muhim platforma ekanligi va O‘zbekiston bunda faol ishtirok etishni rejalashtirayotgani ta’kidlandi.

Tashabbus doirasida taklif etilayotgan tadbirlar yagona mintaqaviy yondashuvni yaratish va silga qarshi transchegaraviy nazoratni kuchaytirish imkonini beradi. Bu esa pirovardida sog‘liqni saqlash sohasidagi global xavfsizlikka olib keladi.

Shuningdek, Asilbek Xudayarov Qozog‘iston sog‘liqni saqlash vaziri Akmaral Alnazarova bilan ham uchrashib, hamkorlik istiqbollarini muhokama qildi.

Bundan tashqari, delegatsiyamiz Qozog‘istonning Shoshilinch tibbiy yordam milliy muvofiqlashtirish markazi, Milliy onkologiya ilmiy markazi, Milliy kardiojarrohlik ilmiy markazida bo‘lib, sog‘liqni saqlash sohasida qo‘llanilayotgan eng ilg‘or yondashuvlar bilan yaqindan tanishdi.